अविरत विस्तारणाऱ्या मुंबई महानगराला थोडा आराम मिळावा म्हणून 'नवी मुंबई' या उप-शहराची निर्मिती केली गेली. शहर आणि औद्योगिक विकास महामंडळ महाराष्ट मर्यादित (अर्थात सिडको) च्या शहर नियोजन विभागाचे मुख्य आधारस्तंभ असलेले, आंतरराष्ट्रीय ख्यातीचे वास्तुविशारद चार्ल्स कोरिया यांनी या शहराच्या आराखड्याची संकल्पना आकारात आणली.

मुंबई शहराच्या आराखड्यातून शिकल्या गेलेल्या अनेक धड्यांपैकी, जल व्यवस्थापन आणि शहरातील गावठाणांची नियोजित बांधकाम आराखड्यातील नवनिर्मित केंद्रांशी सुयोग्य सांगड या दोन महत्त्वपूर्ण धड्यांभोवती या नवीन उप-शहराची निर्मिती आधारलेली असल्याचे जाणवते.

नवी मुंबईच्या मानव निर्मित अनैसर्गिक वातावरणाची पार्श्वभूमी असलेला, एका माश्याचा पाण्यापासून ताटापर्यंतचा प्रवास छायाचित्रांच्या माध्यमातून तुमच्या समोर सादर करत आहोत. आगरी-कोळी समाजाच्या कथांमधून व विविध नकाशांच्या मदतीने मनुष्य आणि पाणी यांच्या बदलत्या संबंधांवर तसंच शहरी आणि ग्रामीण जीवनशैली कशा एकरूप झाल्या आहेत यावर प्रकाश टाकण्याचा हा एक प्रयत्न आहे.